事緣係我收到兩位好朋友的 SMS，內容分別係：「我地唔好再玩呢個無聊遊戲，我唔開心」同埋「對不起，今晚真係好唔開心~因為我認為友情不是建於別人的唔開心之上~真正的愛與友情是能互相在乎大家的感受~說給你們聽是想讓你們明白我的感受~希望你們會明白~也原諒我的坦白~對不起~」。
收到小情侶的 SMS，我立刻好擔心佢地，怕會影響佢地既感情，怕好多好多既事。所以我都即刻回一個 SMS 給她：「sorry ar，令到你唔開心，我地學會體諒你的感受，亦都明白。希望你原諒我地，為了證明我地係真正的朋友，我地下次一定唔會再這樣做。」因為我認為自己作為一個活動的搞手，我的目的係希望每一位朋友都可以盡興而歸，希望大家返到屋企或者再一次想起這一個活動，都會會心微笑，都會有一段值得回憶的回憶。所以見到有朋友因為活動而唔開心，我真係好自責。我覺得自己好大責任，因為自己既大意，而傷害了別人。因為遊戲係我提議的，場地係我提供的，懲罰係我提供的，而懲罰又係我有份參與的。。。我真係唔想大家會有陰影，我真係唔想大家有唔愉快的回憶。
我真係好擔心小情侶的情況，都有同良子商量過點做好。雖然表面上，我地如常晚飯，如常買送，但內心仍然很擔心他們的情況。
接著，我收到她的SMS：「我唸下次玩些健康又開心的遊戲~唔好玩傷害大家既遊戲才是增進感情的方法~願我們能珍惜彼此~不只是我~也是你和杰和其他人也一樣。」所以我亦回了一個 SMS：「多謝你的提議~最想都係見到你地開心番，跟住下次再一起玩益智的遊戲 — 大富翁!」
但原來我心裡面，一直都有一點唔好受的感覺，直到小迪打比我，呢一份唔開心、難過、痛苦的感覺先至爆發出黎。
小迪最初問我知唔知有事發生了，我以為係當晚佢地走左之後，有事情發生，但原來係小迪都收到 SMS。同小迪傾下傾下，我自己真正的感覺，先至慢慢浮現出黎。
我真係好珍惜大家之間既友情，大家係我一生人之中，最重要的朋友。而我自己的個性，亦是好重視別人眼中的自己的類型。所以大家既感覺，我真係會放得比我自己更重要。通常每一次搞活動之前，我都會同良子傾一下有乜野遊戲可以一齊玩。搞活動之後，我地又會傾番今次搞得好唔好呢。每一次搞活動，雖然又麻煩，又辛苦，又要約人，又要用腦，又要搞氣氛，又要拾屋子，但係我都堅持搞落去，因為我希望可以維繫住大家之間既友誼，又可以幫大家製造美好的回憶。見到有朋友因為活動而唔開心，係我最唔想見到的。真的。。。係我最唔想見到，最唔想發生的。。。
原來，到發生左之後，我先至明白到一個事實。
搞活動，如果開心既時候，個個就只會 HAHAHA~ 有唔開心既時候，就會 WaWaWa。責任，都係落番我呢個搞手身上，即使你地覺得係又好，唔係又好，我都係會自責的。原來活動的搞手，每一次都要承擔一個風險，如果大家開開心心就大步誇過，如果有唔開心就要負呢個責任。
當一負起呢個責任，我真係好怕傷害左你地之間既感情。呢個係我的真感覺，但係我自己都有另一番既感覺。
講真，今次既遊戲，係大家有份參與的，係大家有份提議/和議/同意這個懲罰的，所以大家都應該有呢一份既責任。當中一定有一個 risk 係抽中自己或者人地，如果你地係唔 OK，一樣可以反對。更何況，我真係唔係明做你地既。結果，到頭來，大家既快樂就係建築在我的責任上，而我的快樂就要建築在運氣之上，要睇下好唔好彩，會唔會發生一些別人唔想發生的事情。
我唔知道，小情侶後來有沒有吵架，如果你地因為呢件事情而吵架，我作為搞手會為你們的事件而感到抱歉。就係因為我既底線定得太低，所以傷害左你地。我真係會覺得好對唔住你地。
亦都因為呢件事，令我面對自己一生人之中，最難過、最遺憾、最唔想提起的事情。學良子所講，有些傷口，永遠在心裡，難以復原，表面上又難以看見。唔係我想拉埋兩件事一齊黎講，而係因為呢件事既發生，先至令我學會，原來我都曾經被大家傷害過，我都曾經唔開心過，但係我果一次，係無得反轉頭的。
今次的事，都只係發生在平日的友誼活動(OK~ 唔開心可以唔再搞)，而我發生果次，就係我結婚果日。(原來我結婚果日的 blog 都係無面對呢段難過的經歷，到之前的日子我都無勇氣面對過。)
由小時候開始，我對結婚就充滿希望，我希望有一段美滿的婚禮回憶，我希望大家都可以開開心心，大家都可以同我一樣難忘。因為我的家庭是破碎的，我希望我的婚禮，可以補償我媽媽婚姻當中的缺失，我希望透過完美的婚禮，比媽媽知道我搵到一位好好的老公。結果，原本上午都一切順順利利，到晚上，我真係唔想唸起都要去面對。
就係你地改曬我地婚禮的 run down，就係你地破壞曬我童年的夢想，就係你地在我心裡面建立了一個無法復原的傷口，就係你地搞到我地既婚姻永遠有一個陰影，就係你地搞到我每一次提起婚禮相關的事都會想起自己既婚禮係幾咁慘、係幾咁失敗，就係你地搞到我當晚喊到上唔到妝，就係你地搞到我當晚在新娘房喊到連我媽媽、連我伴娘都喊埋，就係你地搞我同阿良的新婚之夜要相擁而哭、哭到半夜三點幾，就係你地搞到我喊到送唔到賓客走，就係你地搞到我喊到連結婚果日都要比我媽媽罵，就係你地搞到我人生永遠有一段補償不到的遺憾，就係你地搞地我連死果一刻都會想起自己既婚禮係幾咁失敗，就係你地令我不斷重溫所有親戚朋友對住我的目光，就係你地破壞我一直以來細心安排的心血，就係你地令我的婚禮無得返轉頭。
就係因為你地改左我婚禮的 run down，就係因為你地以為我既底線好低，就係因為你地以為我好玩得，就係因為你地想玩我地，我無得選擇。
果一刻我真係好憎你地，好討厭你地，但係我有冇 send 過一句 sms 比你地，但係我有冇同你地講過一句下次唔好。點解果一刻痛心的難過，我同阿良要自己面對，而你地小情侶的唔開心，就可以傳染到我們身上來？
所以今次既事件，我就學會了。原來，我曾經都是一個唔開心的參與者。
對唔住，我比你地更唔開心!反正有事發生我就係大罪人！有冇唸過我結婚果日，你地都將痛苦建立在我身上！你地又點會知道果日我喊足成晚？多謝你地比我永世難忘的痛苦！