有個親戚和我媽媽訴苦，話生活過得仲慘過拾紙皮。身邊的兒女都出身了，生活安定無憂，大學畢業、大公司工作、海外生活。外人看他生活好像好風光，實情慘過拾紙皮。所以親戚覺得咁耐以黎，為兒為女流過咁多血汗，到老年只落得清淡既下場，面對現實，只有無奈。事後，我媽媽同我講，唔係個個好似佢咁偉大。唉，見到人地享盡兒女福的時候，其實有冇想過自己年輕時有無好好教育兒女，你自己負出既精神和心力，又有冇人地咁多？想自己既仔女好似人地咁好，只係一個又一個奢望。
養兒防老，或者就係上一代生兒育女的目的。今次，我唔係想講盡孝道，我只係想講，兒女的價值。如果基於養兒防老的概念，孩子的價值，就係退休保障。我只可以講，到左呢一代，如果你想要退休保障，應該買份保險、炒炒股票或者炒炒樓，風險都無「養兒防老」咁高。
我記得我有豆豆既時候，我媽媽第一句就同我講，豆豆係一個負累，咁我即刻同佢講，咁佢生我同我家姐既時候，係咪都覺得我地係負累。跟住，佢無野好講。
紙皮效應，對我好大衝擊，令我回歸一個好原始既問題，點解要生兒育女，點解要生豆豆同朗朗。同你既伴侶，養育一個小朋友，你期望得到乜野？(係咪等佢比家用你？照顧你？)尤其是我這些全職媽媽，我將人生最光輝的時刻，送給我的孩子。我得到既，係乜野？
我唔期望豆豆或者朗朗，長大會養我。因為我覺得，「養兒防老」既概念，其實係出自對孩子的佔有慾，你當孩子係你自己既東西，你供養佢，佢自然要供養返你。其實，孩子是獨立的個體，佢係獨立的生命，佢有佢自己的人生，佢有佢自己的負擔，佢唔屬於你，你亦唔屬於佢。反而退休之後的生活，係屬於你自己既，唔係屬於孩子的，無理由要佢負擔明明係屬於你自己既事情。(好似好不孝哦？)
但，有無好好想過，一個孩子，由出生到成長，和你一起經歷的一切一切，就是最大的回報？一家人的回憶，建立了無可取代的地位，這就是孩子唯一可以給你的東西。如果，年青的時候，你沒有好好享受和孩子相處的時光，每一天只是營營役役，認為孩子只要有好的生活，好的學校，好的學習便充夠。那麼，年老時先至怪孩子無時間陪你，無放你在眼內，不要覺得出奇。一切，都是自己一手造成的，因為你根本無重視過和孩子相處的時光。
無條件負出的愛，才是真正的偉大。孩子每一個笑容，造就我每一分的感動。我真是由心底裡，覺得我老公好偉大。原本我地是毫不相干的兩個人，佢願意無條件照顧我，無條件的照顧我兩個孩子。好多謝你。
點解我要生豆豆和朗朗？答案就是因為愛。