家 – 開始褪色

家的感覺，應該是快快樂樂，團團圓圓，也許就像湯圓一樣，很溫暖、軟綿綿。

爸爸很愛媽媽，媽媽也很愛爸爸，才是一個家。

可惜，從少我家的爸爸就愛很多女人，我家的媽媽就很愛麻將。小時候，家的感覺，總是很冷、很孤獨、很寂寞。團團圓圓的感覺，離我很遠。

童年時候，每當遇到唔開心或者難過的事情，我都會去洗澡，或者溫暖的熱水才能安撫受傷的弱小心靈。我可以一整天都不說話，和自己對話也很有樂趣，反正一整天都是自己和自己還有自己玩耍。別人看我就像快樂活潑的小孩子，得到父母的竉愛，但係原來家中每一個人都只係最愛自己。吵吵鬧鬧的日子，讓我單單只是幼稚園都讀過五間。

今日原本是快樂的日子，但因為面子和麻將，就破壞了一個家。

事緣：應該和不應該的問題

應該做的事：我媽媽見豆放假，同佢一齊去打麻雀，打到零晨兩點半先至返屋企都無所謂，反正豆豆都只係放假，又有小朋友同佢玩，佢至多都只係訓覺。

不應該做的事：我們不應盡豆豆父母的責任，責怪佢，因為佢係我地既長輩，因為我地住一層樓，但係又唔交租比佢，就算佢做乜野事，我地都要尊重佢，唔可以落佢面，責怪佢。

如果，佢今晚只係帶我地出去，又玩到咁夜，我可以一句聲都唔出。但係如果佢中午時候同我講，話想帶豆出去玩，仲會幫我睇住佢，咁我作為豆豆既媽媽，我就要出聲。

一把年紀了，仲可以咁無分寸，講一句「唔打了」有幾難？當豆豆累到訓著了，佢仲可以若無其事，話「豆豆都只係玩之MA」。我都忍唔住要講一句「你覺得佢真係玩咩？佢都累到訓著左了」就係因為佢唔願意講一句「唔打了」，所以幸福就越來越遠。面對最愛的爸爸如是，面對最愛的女兒如是，面對最愛的孫子亦如是。

因為呢件事，我媽媽第二朝上黎同我地講，佢唔當我地係屋企人了，叫我地一係交租，一係搬走，因為佢點都係我地既長輩，我地唔可以咁同佢講野。同埋佢覺得佢而家好等錢洗，人不為己，天殊地滅，所以要趕我地走。

既然佢既定位咁清楚了 – 大家都只係過路人，我地都無謂多講，我地只好靜靜安排搬走。有時，說話一出，想收番就好難。破壞左既野，好難收拾佢既碎片。

為左抹去自己既錯誤，就做了更多既錯誤決定，到頭來，原來這個家，就是這麼脆弱。

如果你告訴我，你既經濟環境，需要我地既幫忙，我會幫你。但係如果你只係為左我地落你面而報仇，咁我只會覺得你想拆散我頭家。

假若我老公是一個不負責任的人，佢大可以留下一句「乜你屋企咁麻煩GA，你老豆又唔滿意我，而家你阿媽又咁樣，我唔理你地了！」跟住留低兩個細路比我，自己就走左去，唔再返黎。幸好，我老公並唔係咁既人，如果唔係就因為我媽媽呢個錯誤既決定，拆散我的家。

當一個女人，面對想拆散自己家庭既女人，可以毫不留情，做母親都無情講，因為我都有我的孩子，我要保護佢地。我都唔想豆豆好似我細個咁，要經歷不停轉學校的痛苦；我都唔想豆豆好似我同我家姐細個咁，等我媽媽打麻將，等到要在酒樓拎張枱布就訓覺，訓到半夜先起身返屋企。

我很愛我的家人，很愛我的家，但面對破壞人士，我都可以好狠心，更可以毫不留情。當這個家，每一個人最愛的只是自己，談什麼偉大，談什麼家？